நடிகர்கள் : சங்ககிரி ராஜ்குமார்
இசை : சங்ககிரி ராஜ்குமார்
ஒளிப்பதிவு : சங்ககிரி ராஜ்குமார்
இயக்கம் : சங்ககிரி ராஜ்குமார்
தயாரிப்பு : சங்ககிரி ராஜ்குமார்
நான்கு நண்பர்கள் மற்றும் கார் ஓட்டுநர் ஒருவர் என ஐந்து குழுவின் பயணத்தில் தொடங்கும் கதை, மனிதனின் பேராசையால் ஒரு உயிரினம் கூட இல்லாமல் உலகம் அழிந்துவிடும் ஒரு கண்டுபிடிப்பின் ரகசியம் தெரிய வருகிறது. அதை பயன்படுத்தி 10 நாட்கள் உலகையே ஆள வேண்டும் என்று ஆசைப்படும் நான்கு நண்பர்களின் ஆசை நிறைவேறியதா ?, யாரும் இல்லாத உலகில் தனி ஆளாக வாழ துடிக்கும் நாயகனின் ஆசையின் பின்னணியில் எத்தகைய ஆபத்து இருக்கிறது, என்பதை விவரிப்பது தான் கதை.
ஹாலிவுட் உள்ளிட்ட உலகின் எந்த ஒரு சினிமாவிலும் மேற்கொள்ளப்படாத ஒரு சாதனைப் பயணத்தை வெற்றிகரமாக முடித்து, உலகையே வியப்பில் ஆழ்த்தும் விதத்தில் இப்படத்தை தனி மனிதராக உருவாக்கியிருக்கும் சங்ககிரி ராஜ்குமார், அதற்கான கதைக்களம் மற்றும் காட்சிகளை கையாண்ட விதம் பிரமிக்க வைக்கிறது.
கார் சேசிங், ஹெலிகாப்டர் சாகசம், ரயில் சாகசம், விமானப் பயணம் என்று பல்வேறு பிரமாண்டமான காட்சிகளை கிராபிக்ஸ் மூலம் மேற்கொண்டிருந்தாலும், அதற்கான பின்னணியில் தனி ஒருவராக மிக கடுமையான உழைப்பை கொடுத்திருப்பது திரையில் தெரிகிறது.
இப்படி ஒரு கதையை வைத்துக் கொண்டு உலகம் முழுவதும் பயணிக்கும் முயற்சியை அமெரிக்காவோடு முடித்துக் கொண்டு மீண்டும் தமிழகம் நோக்கி பறக்கும் ஒரு பயணத்தின் மூலம் கதையை முடிக்கும் சங்ககிரி ராஜ்குமாரின், இத்தகைய சாதனை முயற்சியை தமிழ் சினிமா மட்டும் அல்ல, ஒட்டு மொத்த இந்திய சினிமாவே கொண்டாட வேண்டும்.
இப்படி ஒரு முயற்சியை சிந்திப்பதே மிக சவாலாக இருக்கும் போது, அதை தனி மனிதராக செயல்படுத்தியிருக்கும் சங்ககிரி ராஜ்குமார், அதற்கான சாதனங்களை தானே உருவாக்கி, அதன் மூலம் காட்சிகளை படமாக்கிய விதம், படத்தில் இடம்பெறும் கூட்டம் நிறைந்த திரையரங்க காட்சியில் கூட தான் மட்டுமே பலவிதமான கெட்டப்புகளில் நடித்தது, வனப்பகுதியில் படமாக்கப்பட்ட கூட்டம் நிறைந்த காட்சி என்று அனைத்தையும் பிரமிக்க வைக்கும் விதத்தில் கையாண்டு கைதட்டல் பெறுகிறார்.
கிராபிக்ஸ் காட்சிகள் தான் படத்தின் முக்கியமான அம்சம் என்றாலும், அதன் தரம் சற்று குறைவாகவே இருக்கிறது. இருந்தாலும், இப்படி ஒரு முயற்சியில் அந்த குறை கண்ணுக்கு தெரியாமல், தனி ஒருவரால் இப்படி ஒரு படத்தை எப்படி எடுக்க முடியும் ? என்ற கேள்வி நம் மனங்களை ஆட்கொள்ளும் விதத்தில் படத்தை கையாண்டிருக்கிறார் ஒன் மேன் சங்ககிரி ராஜ்குமார்.
தமிழகத்தில் மட்டும் இன்றி அமெரிக்காவிலும் தனி மனிதராக காட்சிகளை படமாக்கி, அதற்கான கிராபிக்ஸ், ஒளிப்பதிவு, இசை, படத்தொகுப்பு உள்ளிட்ட தொழில்நுட்ப பணிகளையும் தனி ஒருவராக மேகொண்டிருக்கும் சங்ககிரி ராஜ்குமாரின் ‘ஒன் மேன்’ படம் சினிமா விரும்பிகளை மட்டும் இன்றி, சினிமா மீது ஆர்வம் இல்லாதவர்களை கூட வியப்பில் ஆழ்த்தும்.
ரேட்டிங் 4.5\5