பாண்டிய நாடு – விமர்சனம்

கமர்ஷியல் இயக்குனர் சுசீந்தரனின் அடுத்த படைப்பு. சொல்லி வைத்தது போல பாண்டிய நாட்டையும் போரடிக்காமல் பார்க்க வைத்திருக்கிறார். மதுரை மண்ணில் நடக்கும் கதை. சில மாதங்களுக்கு முன்னால் பரபரப்பை ஏற்படுத்திய கிரானைட் விவகாரத்தை அது நடந்த இடத்திலேயே படமாக்கியது சுசீந்திரனின் துணிச்சலை காட்டுகிறது. பாசக்கார அப்பா, அம்மா குடும்பத்தோடு வம்பு தும்புக்கு போகாமல் நல்ல பிள்ளையாக வாழ்ந்து வரும் ஹீரோ. மதுரையில் பத்து லட்சத்துக்கு மேல யாராவது சொத்து வாங்கினால் அதில் கமிஷன் கேட்கும் வில்லன்கள் என்று இரண்டு பக்கத்தை வைத்துக் கொண்டு விறுவிறுப்பாக கதைசொல்லியிருக்கிறார் சுசீ.

தனக்காக சண்டை போடநண்பனை அழைத்து வரும் பாத்திரத்துக்கு விஷால் நடிக்க ஒப்புக்கொண்டது அவருக்கு நல்ல ஆரம்பம். லேசாகடென்ஷனானலே திதிதிதிக்கிக்கொள்ளும் இடம் சூப்பர். “ஏங்க என்னங்க” என்று லட்சுமிமேனன் பின்னால் சுற்றும்போதும், அண்ணனை கொன்ற வில்லனை வெறியோடு தேடி அலையும் போதும், அப்பா பாரதிராஜாவை ஒரு இடத்தில் பார்த்துவிட்டு கலங்கும் போதும் விஷால் நடிப்பில் வெளிச்சம். பாரதிராஜா நடிப்பில் அசத்தியிருக்கிறார். மகன் இறந்த தகவலை கேட்டு “என்னடா சொல்றீங்க” என்று சுவரோரம் சரிந்து விழும் இடத்திலும் “எம்புள்ளைக்கு குடிக்கிற பழக்கம் இல்ல” சார் என்று கலங்கும் போதும், ”அவனை கொல்லனும்டா” என்று உள்ளுக்குள் குமுறுவதும் அட்டகாசநடிப்பு. இனி நடிப்பில் தீவிர கவனம் செலுத்தினால் இயக்குனர் இமயத்திற்கு விருதுகள் நிச்சயம்.

ஸ்கூல் டீச்சராக பாந்தமாக புடவை கட்டிக்கொண்டு வரும் லக்ஷ்மிமேனன் மனதில் பதிகிறார். “உங்கள பார்க்கும் போது மனசுக்குள்ள லேசா ப்ப்ப்ப்ப்லீங்” என்று விஷாலை நக்கலடிப்பது அழகு. சில நிமிடங்களே வந்தாலும் விக்ராந்த் பளிச். சூரி நிறைவான நடிப்பு.

மதுரை கேங் வாரை அப்படியே காட்டியிருக்கிறார் இயக்குனர். அதுவும் சிம்மக்கல் ரவியும், சிவப்பு ராஜாவும் மோதிக்கொள்ளும் இடம் மிரட்டல். எப்போது பத்துபைக்குகள் பின் தொடர காரிலேயே தூங்கிக் கொண்டு வரும்காட்சி வில்லன்களின் வாழ்க்கையை வெளிச்சம் போட்டுகாட்டுகிறது.

ஒரு பக்கம் விஷால் துரத்த, இன்னொரு பக்கம் பாரதிராஜா ஏற்பாடு செய்த கூலிப்படை துரத்த விறு விறுப்பான இடம் அது. அதுவும் பணத்தை திரும்ப வாங்கப் போகும் பாரதிராஜா மாட்டுத்தாவணி பஸ்ஸ்டாண்டில் பதட்டத்துடன் வரும்காட்சியில் நம்மையும் பதற வைக்கிறார்கள் இயக்குனர் சுசீந்தரனும், இயக்குனர் பாரதிராஜாவும்.

ஒளிப்பதிவும், சண்டை காட்சியும் படத்திற்கு பலம் சேர்க்கின்றன. நீண்ட நாட்களுக்குப் பிறகு பாடல்களைகேட்டு ரசிக்கும் படியாக இருந்தது. காரணம் கவிபேரரசு வைரமுத்து. “ஏலே ஏலே மருது” பாடலில் காதலையும், ‘ஒத்தக்கடை மச்சான்’ பாடலில் குறும்பையும் தன் தமிழில் குழைத்து கொடுத்திருப்பார். இரண்டாம் பாதியில் வரும் ‘பைபை’ பாடல் படத்தின் வேகத்திற்கு தடை போடுகிறது. அந்தபாடலை யோசிக்கமால் கத்திரி போட்டால் விறு விறுப்புகூடும்.

பாண்டிய நாடு – விசிட் பண்ண வேண்டிய இடம்.