ஏ.ஆர்.முருகதாஸ் கதையில் நடிக்கிறார் சல்மான்கான்

முதலில் சின்னதாக ஒரு கதை. தமிழில் ரமணா படம் ஹிட் ஆனதும் அதே படத்தை தெலுங்கில் தன்னை வைத்து இயக்கும்படி ஏ.ஆர்.முருகதாஸிடம் கேட்டார் சிரஞ்சீவி. ஆனால் க்ளைமாக்ஸ் உட்பட கதையில் அங்கங்கே சில மாற்றங்கள் செய்யுமாறு சிரஞ்சீவி கேட்டதால் அதற்கு மறுத்துவிட்ட ஏ.ஆர்.முருகதாஸ் தனது உதவி இயக்குனருக்கு அந்தப்படத்தை இயக்கும் வாய்ப்பை கொடுத்துவிட்டார்.

ஆனாலும் சிரஞ்சீவி முருகதாஸை விடுவதாக இல்லை. தனது அடுத்த படத்தை இயக்கும்படி முருகதாஸிடம் சொல்ல, அதற்கு சம்மதித்த முருகதாஸ் அவரை வைத்து இயக்கிய படம்தான் ஸ்டாலின். தெலுங்கில் சூப்பர் டூப்பர் ஹிட்டான இந்தப்படத்தின் இந்தி ரீமேக்கில்தான் தற்போது சல்மான்கான் நடித்துவருகிறார்.

படத்திற்கு மெண்டல் என பெயர் வைத்திருக்கிறார்கள். பெயர்தான் அப்படி இருக்கிறதே தவிர படத்தில் ராணுவ வீரராக நடிக்கிறார் சல்மான். ஹீரோயினாக டெய்சி ஷா நடிக்க, ஒருகாலத்தில் சல்மானுக்கு ஜோடியாக நடித்த தபு இந்தப்படத்தில் அவருக்கு அக்காவாக நடிக்கிறார். நம்ம ‘சிலம்பாட்டம்’ சனாகான் முக்கிய வேடத்தில் நடிக்கிறார். இந்தப்படத்தை சல்மானின் தம்பியான சோகைல் கான் இயக்குகிறார்.