தனுஷுக்கு ஜோடியாக பாலிவுட் ஹீரோயின்

கே.வி.ஆனந்த் தன்னுடைய படத்தில் நடிக்கும் ஹீரோயின்களுக்கும் முக்கியத்துவம் கொடுப்பார். கோபிகா, தமன்னா, காஜல் அகர்வால் முதல் கோ படத்தில் அறிமுகமான கார்த்திகா வரை அவரது படங்களில் நடித்தவர்களுக்கு ஹீரோவுக்கு சமமான கேரக்டரை கொடுத்திருப்பார். அந்த வகையில் இந்த முறை தனுஷை வைத்து தான் இயக்கும் படத்திற்கு பாலிவுட்டிலிருந்து ஹீரோயினாக இறக்குமதி செய்திருக்கிறார்.

அவர் தேர்ந்தெடுத்திருப்பது இந்தியில் இஷாக் படத்தில் நடித்த அமிரா டஸ்டர் என்பவரைத்தான். வோடஃபோன் மற்றும் மைக்ரோமேக்ஸ் விளம்பரங்களில் மாடலாக நடித்தவர்தான் இந்த அமிரா. இவரை இந்தியில் அறிமுகப்படுத்தியவர் பிரபல இயக்குனரான மனிஷ் திவாரி. தனுஷ் பாலிவுட்டில் செட்டிலாகப் போகிறாரோ இல்லையோ, பாலிவுட் ஹீரோயின்கள் இருந்து அவரைத்தேடி வர ஆரம்பித்துவிட்டார்கள் என்றுதான் சொல்லவேண்டும்.